أنا عارف إني ظلمتك يا صالح، وعارف إن ماليش عين أقابلك بعد كل اللي عملته فيك، ومش هقدر أبرر لنفسي اللي حصل زمان، بس والله العظيم أنا ندمت، وندمان على كل يوم عدى وأنا بعيد عنك.
أنا مش جاي أطلب منك مساعدة ولا فلوس، أنا جايلك عشان أطلب منك تسامحني، نفسي أطمن وأنا عارف إن ابني مسامحني.
صالح كان بيسمعه بهدوء، ملامحه مافيهاش غضب ولا شماتة، لكنه رد عليه بحزم:
بص يا حاج محمود، أنا مش هقولك إني نسيت اللي حصل، ولا هقدر أقولك إني مسامحك، لأن اللي أنت عملته مش سهل.
أنت حرمتني من أبسط حقوقي، وحرمت أمي من حقها في الراجل اللي كانت متجوزاه، وفضلت سنين بتعامل ابن مراتك على إنه ابنك الحقيقي، لدرجة إنك كنت بتتمنى الناس تناديك بأبو رامز، وأنا ابنك الحقيقي كنت برجع من المدرسة أعيط عشان الناس بتناديك باسم ابن غيري.
محمود نزل راسه ودموعه بدأت تنزل، وصالح كمل:
أنا هتقي ربنا فيك، وده واجب عليا، لكن ده مش معناه إني هسامحك. أنا هتعامل معاك باللي ربنا أمرني بيه عشان ما اتحاسبش عليك، إنما ظلمك ليا ولأمي مش هسامح فيه، وحقنا عند ربنا.
رفع محمود عينه له، وصالح كمل كلامه:
عزت أخويا، وهيفضل شغال هنا زي ما هو هو مالوش ذنب فى الماضى، وأنا مش هاخده بذنبك، الولد مالوش ذنب في اختياراتك ولا في اللي عملته زمان. بالعكس، أنا شايف إنه ابن أصول، وبيعمل معاك اللي أنت ماعملتوش معايا.
وبالنسبة ليك، أدويتك ومصاريف علاجك وشهريتك كل شهر هتكون عندك، ومش هخليك تحتاج لحاجة طول ما أنا قادر أوفرهالك، لكن متطلبش مني إننا نرجع زي الأول، لأن فيه حاجات لما بتتكسر مش بترجع زي ما كانت.
محمود ماقدرش يتمالك نفسه، وفضل يعيط وهو بيقول:
ربنا يكرمك يا ابني، أنا ما استاهلش منك كل ده.
صالح رد بهدوء:
أنا مش بعمل ده عشانك أنت، أنا بعمله عشان أمي ربتني على الأصول، وعشان مش عايز أقف قدام ربنا وأنا قصرت في حق أبويا، مهما كان هو عمل فيا إيه.
محمود قام من مكانه بصعوبة، وصالح قام وفتح له الباب، لكنه ماحاولش يحضنه ولا يمنعه من الخروج. اكتفى إنه يوصي عزت يهتم بأبوه، ويرجع يكمل شغله. خرج محمود من المكتب وهو مكسور، لكن المرة دي كان الوجع مختلف، لأنه شاف بعينه الابن اللي تخلى عنه، ولقى فيه رحمة وأصل ما لقاهمش في الناس اللي ضحى عشانه بيه.
ومرت الأيام، وصالح فضل محافظ على وعده، كل شهر مصاريف محمود وعلاجه بتوصله، وعزت فضل شغال معاه، بل إن صالح بدأ يعلمه أكتر ويديله مسؤوليات أكبر. أما صالح، فحياته كانت بتتقدم، وقرر يتجوز ويبدأ أسرته، وكان المعلم كامل جنبه في كل خطوة، ووقف معاه في تجهيزات الجواز، وكان وكيله في كل حاجة، وبيتعامل معاه بفخر كأنه ابنه اللي رباه وكبره.
ويوم فرح صالح، كان كامل واقف جنبه، بيستقبل المعازيم وبيوصي عليه، وصالح وسط فرحته كان بيناديه يا بابا، والكلمة دي كانت بتخرج منه بكل حب وتقدير. أما محمود، فكان بيوصله أخبار ابنه من عزت، وكل ما يعرف إن صالح حقق نجاح جديد، أو اشترى حاجة، أو اتجوز، كان الندم بيزيد جواه.
كان نفسه يكون موجود في يوم فرحه، يكون هو اللي واقف جنبه، ويكون هو اللي الناس بتقوله أبو العريس، لكن اختياراته القديمة حرمته من كل ده. وفي كل مرة كان يشوف عزت راجع من الشغل فرحان وبيحكي له عن صالح، كان يحس بمرارة أكبر، لأنه اكتشف متأخر إن الابن اللي رماه كان أكرم عليه من كل الناس اللي فضّلهم عليه.
وانتهت الحكاية، لكن ندم محمود فضل معاه، لأن بعض الأخطاء ممكن ربنا يفتح لنا باب التكفير عنها، لكن مش بالضرورة يفتح لنا باب استرجاع اللي خسرناه.
