لجزء الأول: «هو إنتِ كمان مبقتيش بتحبيني يا ماما؟» بعد طلاقي اتجوزت راجل كان محروم من الخلفة، وقفت جنبه أربع سنين علاج وتعب وصبر، ولما ربنا رزقه بولد، وفي التاني طلب مني أرمي بنتي من جوزي الأول!
قال لي بكل برود: — اسمعي يا بت الحلال، أنا راجل رزقي على قد حالي، وأنا صبرت على وجود بنتك السنين اللي فاتت، إنما دلوقتي عندي عيال من لحمي ودمي، ومش هخليهم يتعبوا ولا يتظلــ,,ـــــموا علشان بنت ملهاش علاقة بيا، ولا من دمي، ولا هتنفعني بشيء!
وعلشان نبقى واضحين، يا بنتك تروح تعيش عند أهل أبوها، يا أطلقك وآخد عيالي، وإنتِ خدي بنتك وشوفي هتروحي فين! بصيتله وأنا حاطة إيدي على بطني، وقلتله بدموع: — يعني بعد ما صبرت معاك ووقفت جنبك لحد ما بقيت أب، عايز تحرمني من بنتي؟
! دي ملهاش حد يا محمود، وأبوها سافر وسابها، وأنا مليش أهل ولا بيت أرجعله! أنا يتيمة يا محمود… مليش غيرك إنت وعيالي وبنتي! قرب مني وقال بمنتهى القسوة: — دي مش مشكلتي! قدامك أسبوع تختاري… يا بنتك، يا بيتك وعيالك! وقتها حسيت إن الدنيا كلها ضاقت عليّا.
أنا اسمي هدى، عندي تلاتين سنة، واتربيت يتيمة من وأنا عندي عشر سنين. أبويا وأمي ماتوا في دــ,,ـــــادثة، واتنقلت من بيت قريب لبيت قريب، لحد ما اتجوزت أول جوازة وأنا عندي تسعتاشر سنة. كنت فاكرة إن الجواز هيعوضني عن الحرمان اللي شوفته، لكن طلعت من الجوازة دي ببنت صغيرة، وقلب مكسور، وطلاق خلاني أواجه الدنيا لوحدي.
بنتي رغد كانت عندها سنتين لما أبوها طلقني وسافر، ومن يومها لا سأل عليها ولا بعتلها مصاريف. اشتغلت في تنظيف البيوت، وكنت بسيبها عند جارتي أم حسن، وأرجع آخر النهار ألاقيها مستنياني عند الباب. كانت أول ما تشوفني تجري عليّا وتقول: — ماما جابتلي إيه؟
حتى لو كنت راجعة برغيف عيش وحته حلاوة، كانت تفرح كأني جايبالها الدنيا كلها. ولما محمود اتقدملي، كان مطلق بسبب مشكلة في الإنجاب. قالي يومها: — أنا عارف إن معاكي بنت، وأنا موافق بيها قبل ما أوافق بيكي، واعتبريها بنتي.
ساعتها بكيت من الفرحة. وقلت لنفسي إن ربنا أخيرًا بعتلي راجل يطبطب على قلبي وقلب بنتي. أول سنة كانت جميلة. محمود كان بيجيب لرغد هدوم العيد، وياخدها معاه الجامع، وهي كانت بتناديه بابا محمود. فاكرة أول مرة قالتله بابا. كان راجع من الشغل، جريت عليه وقالت: — بابا محمود، شيلني!
ضحك وشالها، وباس خدها، وقاللي: — البت دي دخلت قلبي يا هدى. يا ريت الزمن كان وقف عند اللحظة دي. بعد سنة من جوازنا بدأنا رحلة العلاج. تحاليل، ودكاترة، وحقن، وأدوية، وسفر من بلد لبلد. كنت ببيع دهبي واحدة واحدة علشان مصاريف العلاج، وهو كان كل ما يفقد الأمل، أقعد جنبه وأقوله: — ربنا كريم يا محمود، ولو مخلفناش، رغد بنتنا، وإنت مش ناقصك حاجة.
كان يعيط ساعات ويقولي: — إنتِ الست الوحيدة اللي استحملتني. وأنا كنت أصدقه. بعد أربع سنين ربنا رزقني بالحمل. يوم ما الدكتور قالنا إن الجنين ولد، محمود سجد على أرض العيادة من الفرحة. وأنا كنت واقفة بعيط، مش علشان الولد، لكن علشان أخيرًا شفت الفرحة في عينيه.
ولدت ابني ياسين، وبعد سنة ونص حملت تاني. ومن يوم ما ياسين اتولد، محمود اتغير. بقى يشتري لياسين كل حاجة، ولما رغد تطلب حاجة يقولها: — إنتِ كبرتي على الدلع ده. لو ياسين كسر طبق يضحك، ولو رغد وقعت منها معلقة يزعق فيها.
في الأول كنت بقول غصب عنه، فرحان بابنه بعد سنين الحرمان. لكن الموضوع زاد. لحد اليوم اللي قالي فيه إنه مش عايز بنتي تعيش معانا. بعد كلام محمود، دخلت أوضة رغد ولقيتها قاعدة على سر,,ـــــيرها الصغير، وحاضنة عروستها القديمة.
كانت عندها عشر سنين، لكن عينيها بقت عيون واحدة شافت وجع أكبر من سنها. بصتلي وقالت: — ماما، هو بابا محمود زعلان مني علشان أكلت حتة اللحمة؟ استغربت وقلتلها: — لحمة إيه يا حبيبتي؟ قالت وهي بتبص في الأرض: — امبارح لما حطيتلي حتة لحمة في طبقي، هو قالي سيبيها لأخوكي، وأنا أكلتها بالغلط علشان كنت جعانة… هو علشان كده مش بيحبني؟
حسيت بسكــ,,ـــــينة بتتغرس في قلبي. حــ,,ـــــضنتها وقلتلها: — يا حبيبتي إنتِ من حقك تاكلي وتشربي وتلبسي وتفرحي زي إخواتك. رفعت وشها وقالت: — طب ليه هو بيقول إن ياسين ابنه وأنا لأ؟ مكنتش عارفة أجاوب. فضلت ساكتة، وهي مسحت دموعي بإيديها الصغيرة وقالت: — متعيطيش يا ماما، أنا مش زعلانة، والله مش زعلانة.
لكنها كانت زعلانة. كنت بشوفها بالليل وهي نايمة، وحاضنة عروستها، وبتعيط من غير صوت. عدى الأسبوع، ومحمود بدأ ينفذ تهديده. في يوم كنا قاعدين بنتغدى، ورغد مدت إيدها تاخد حتة بطاطس من الطبق. محمود خبط بإيده على السفرة وقال: — مش تستني لما أخوكي ياكل الأول؟
! رغد اتخضت وسحبت إيدها. قلتله: — يا محمود، الأكل كتير، سيب البنت تاكل. بصلي بعصبية: — ما تتدخليش! أنا بربيها. قلتله: — التربية مش بالإهانة. قام من على الكرسي وزعق: — إنتِ لسه هتعلميني أربي في بيتي؟! رغد قامت بسرعة وقالت: — خلاص يا بابا، أنا شبعت. بصيت على طبقها.
كان لسه مليان. ناديت عليها: — تعالي يا رغد، كملي أكلك. لكنها ابتسمت ابتسامة صغيرة وقالت: — والله شبعت يا ماما. ودخلت أوضتها. بعدها بدقايق دخلت وراها، لقيتها قاعدة على الأرض وبتاكل حتة عيش ناشفة كانت مخبياها في درجها. وقفت مكاني مش قادرة أتحرك.
لما شافتني، خبت العيش ورا ضهرها وقالت بخوف: — أنا مش بسرق يا ماما… ده العيش بتاعي من الفطار. نزلت على ركبي وحــ,,ـــــضنتها. فضلت أبوس إيديها ووشها وأنا بقول: — سامحيني يا بنتي… سامحيني. قالت باستغراب: — أسامحك على إيه يا ماما؟ قلت وأنا ببكي: — علشان خليتك تخافي تاكلي في بيت أمك.
من اليوم ده، بقيت أحاول أكلها قبل ما محمود يرجع. وأخبي لها الفاكهة في شنطتها، وأحط لها سندوتش زيادة وهي رايحة المدرسة. لكن محمود اكتشف. وفي يوم رجع بدري ولقاني بديها تفاحة. قال بسخرية: — الله! وبقينا نستخبى علشان نأكل الهانم! قلتله: — دي بنتي يا محمود، ومش هحرمها من الأكل.
