سحب إيده مني وقال بضيق: «أنا تعبان، ومش ناقص خناق. قولي حصل إيه؟» وقتها خرج مني الكلام اللي كنت كاتماه طول اليوم. «أم رباب جات النهارده وشافت بنتها وهي شايلة البصل على ضهرها، ولما بنتي ضحكت عليها، فهمت كل حاجة، وقالتلي إنها هتاخد بنتها وتمشي!
» محمود سكت، ووشه اتغير، لكن بدل ما يثور أو يتعصب، نزل عينيه للأرض وقال بصوت واطي: «وهي عندها حق يا أمي». حسيت كأن حد صب عليا مية ساقعة. «إيه؟! عندها حق في إيه؟! دي مراتك يا محمود!
» رفع عينه وبصلي لأول مرة بنظرة عمري ما شفتها منه قبل كده. «مراتي آه، بس هي بني آدمة وليها كرامة، وإنتِ ظلمتيها كتير. وأنا ساكت، وكل مرة أقول هتكلم، أخاف أزعلك أو أزعّلها أكتر». اتعصبت وقلتله: «يعني أنا اللي غلطانة دلوقتي؟!
أنا اللي ربيتك وصرفت عليك ووقفت جنبك، وفي الآخر تيجي تحاسبني عشان واحدة غريبة؟!» رد بهدوء موجع: «ربنا يخليكي ليا يا أمي، بس ده مش معناه إننا نظلم الناس عشان خاطرنا». الكلام وجعني، بس بدل ما أراجع نفسي، حسيت إن ابني بيضيع من إيدي، وإن كل اللي كنت خايفة منه هيحصل.
قربت منه وقلت بصوت واطي: «اسمعني يا محمود، أمها مستنية مكالمة بكرة الصبح. لو البنت اتصلت وقالت إن كل حاجة تمام، الست دي مش هتقدر تفتح بقها، وكل واحد هيرجع بيته. إنما لو حصل غير كده، مش هتقدر تسكتها، ولا أنا هقدر أسكت البلد».
محمود فضل باصصلي، وبعدها قال: «يعني إنتِ عايزاني أعمل إيه؟» السؤال ده كان المفروض يخليني أفهم إنه محتاج مساعدة، وإن الموضوع أكبر من مجرد خوف من كلام الناس، لكن أنا كنت عايزة نتيجة وخلاص. قلتله: «عايزاك تدخل لمراتك، وتتكلم معاها، وتطمنها، وتعيشوا زي أي اتنين متجوزين.
هي مراتك يا ابني، مش عدوك!» هز راسه وقال: «أنا حاولت يا أمي، والله حاولت». وقتها حسيت إنه بيهرب من الكلام، فزعقت: «حاولت إيه؟! سبع شهور يا محمود! سبع شهور والناس بتسألني كل يوم عن حفيدي، وأنا مش عارفة أرد عليهم!
» محمود غمض عينيه لحظة، ولما فتحهم كان فيهم دموع. «إنتِ مش عارفة أنا بمر بإيه، ومش عارف حتى أحكيلك إزاي». اتسمرت مكاني. لأول مرة أحس إن ابني شايل جواه حاجة أكبر من اللي أنا متخيلاه، لكن بدل ما أحتويه، ضغطت عليه أكتر.
قلتله: «خلاص، النهارده مش عايزة أسمع منك كلمة تاني. الليلة دي لازم كل حاجة تتحل، وأنا مش هسمح إنك تبقى أضحوكة للبلد». سابني ودخل أوضته، وأنا فضلت واقفة مكاني، مش عارفة ليه كلامه كان مخوفني بالشكل ده. بعد شوية، سمعت صوت باب أوضته بيتقفل، وبعدها سمعت صوته وهو بيكلم رباب.
كنت هقرب أسمع، لكن بنتي منى ظهرت من المطبخ وقالتلي: «سيبيهم يا أمي، يمكن يعرفوا يتفاهموا». بصلها بغضب وقلت: «إنتِ آخر واحدة تتكلم! ضحكتك النهارده هي اللي فضحتنا». وشها اتغير، وقالت: «أنا غلطت لما ضحكت، بس إنتِ كمان غلطانة.


